د بلوچستان ازادۍ غورځنګ (بياېلاې) ویاند جیئند بلوڅ په یوه خبرپاڼه کې ویلي، چې وسلهوالو یې د پاکستاني پوځ پر موټر بمي برید کړی، چې په ترڅ کې یې اووه پوځیان وژل شوي او څلور نور مرګوني ټپیان شوي دي.
نوموړي زیاته کړې، چې برید د بلوچستان ایالت کیچ ولسوالۍ زامران سیمه کې ترسره شوی.
هغه ویلي، چې د وژل شویو پوځیانو په منځ کې یو شمېر افسران هم شامل دي او موټر یې په بشپړ ډول ویجاړ شوی دی.
د یادونې ده، چې د یاد غورځنګ وسلهوالو په یوه بل جلا برید کې د کولوا ولسوالۍ په مادګ کلات سیمه کې د پاکستاني پوځ پر یوې پوستې د سپکو او درنو وسلو برید کړی او مرګژوبله یې ور اړولې ده.
د پاکستان پوځ او ځایي حکومتي ادارو په دې اړه څه نهدي ویلي؛ خو تر دې وړاندې یې پر پاکستاني پوځیانو ترسره شوي ډېری بریدونه سانسور کړي دي.