د ریاست الوزراء اقتصادي مرستيال ملا عبدالغني برادر کابل کې د برښنا شرکت له لوري «د پانګونې جذب او د افغانستان د برښنا سکټور ملاتړ» تر عنوان لاندې کنفرانس ته په خپله وينا کې ويلي، چې افغانستان د لویو، متوسطو او کوچنیو پانګونو لپاره پراخ او لوی ظرفیتونه لري او د تولیدي منابعو د خامو موادو د کافي ذخایرو درلودلو له امله غني هېواد بلل کېږي.
ښاغلي برادر د افغانستان برښنا سکتور د پراختیا لپاره د کورنیو او بهرنیو پانګوالو د جذب، په برښنا سکټور کې د پانګونې موجودو فرصتونو د معرفي کولو، په دغه سکټور کې د ننګونو د څېړلو او د غوره حللارو وړاندې کولو په اړه د دغه کنفرانس جوړېدل مهم بللي.
نوموړي همدا راز پر ټولو هېوادونو، نړیوالې ټولنې او نړیوالو مالي بنسټونو غږ کړی، چې نور دې پر افغانستان لګول شوي مالي او بانکي محدودیتونه پای ته ورسوي او په خبره یې دا د افغانستان، سیمې او نړۍ په ګټه نه دي.