د بهرنيو چارو وزارت درېيم سیاسي رييس ذاکر جلالي ډونالډ ټرمپ ته: له امريکا سره د متقابل درناوي پر بنسټ اړيکې غواړو؛ خو پوځي حضور افغانانو په تاريخ کې نه دی منلی او اوس یې هم نه منو
د بهرنيو چارو وزارت درېيم سیاسي رييس ذاکر جلالي د بګرام هډې د بېرته نيولو په اړه د امريکا د ولسمشر ډونالډ ټرمپ خبرو ته په غبرګون کې ويلي، چې افغانستان له امريکا سره په متقابل درناوي ولاړې سياسي اړيکې غواړي؛ خو د چا پوځي حضور یې په تاريخ کې نه دی منلی.
نوموړي همدا راز زياته کړې، چې ډونالډ ټرمپ پر بګرام د معاملې خبره کړې او په خبره یې نوموړی تر سياست هاخوا بريالی تاجر او معاملهکوونکی دی او د بګرام د بېرته اخيستو يادونه هم د يوې معاملې له لارې کوي.
ښاغلی جلالي وايي:«افغانستان او امريکا يو بل سره تعامل ته اړتيا لري او کولای شي د متقابل درناوي او مشترکو ګټو پر بنسټ اقتصادي او سیاسي اړيکې ولري، بې له دې چې امريکا د افغانستان په کومه برخه کې پوځي حضور ولري.»
نوموړی زياتوي، چې پوځي حضور افغانانو په تاریخ کی نه دی منلی او په وینا یې دا احتمال د دوحې د خبرو او هوکړې پرمهال هم په بشپړ ډول رد شوی مګر نور تعامل ته دروازې پرانيستې دي.
