افغان حکومت د امريکا د ولسمشر ټرمپ له لوري د باګرام هډې بېرته ترلاسه کولو اړوند وروستيو څرګندونو ته په غبرګون کې ويلي، چې د شرعي اصولو په رڼا کې د خپل متوازن او اقتصاد محوره بهرني سیاست له مخې له ټولو هېوادونو سره د دوه اړخیزو او مشترکو ګټو په اساس مثبتې اړیکې غواړي.
په اعلاميه کې زياته شوې، چې امریکا ته په ټولو دوه اړخیزو مذاکراتو کې روښانه شوې ده چې د «اسلامي امارت» لپاره د افغانستان خپلواکي او ځمکنۍ بشپړتیا له هرڅه زیات اهمیت لري.
افغان حکومت همدا راز وايي، چې د دوحې په هوکړه لیک کې امریکا ژمنه کړې چې «د افغانستان ځمکنۍ بشپړتیا او سیاسي خپلواکۍ پر ضد له ځواک او ګواښ څخه کار نه اخلي او نه به یې په کورنیو چارو کې لاس وهنه کوي»، نو په کار ده چې دوی خپلو ژمنو ته ژمن پاته شي.
په اعلاميه کې راغلي، چې امريکا بايد د تېرو ناکامو تجربو د تکرار پر ځای عقلاني او واقعبینانه تګلاره خپله کړي.