د ایران مذهبي رهبر ته نږدې، کیهان ورځپاڼې په يوه تحليلي راپور کې ویلي، چې د ایران احتمالي جګړه له امریکا او اسرائیل سره «ډېره نږدې او ممکنه» ده او دا نښته به نړیوالې پایلې ولري.
دغې ورځپاڼې د ایران د اوسني اقتصادي بحران د توجیه لپاره یو ځل بیا له اسرائيل سره د ۱۲ ورځو جګړه او بهرني بندیزونه یاد کړي او ویلي یې دي، چې د ایران کورنی یووالی او پوځي ځواک د امریکا او اسرائیل د ناکامۍ اصلي لامل دی.
بلخوا بيا د اسرائیل پخواني دفاع وزیر او د لومړي وزیر نتنیاهو مخالف «اویګدورلیبرمن» وايي، هغه کسان چې فکر کوي له ایران سره شخړه پای ته رسېدلې، «په غلط فکر دي او نورو ته هم نادرست پیغام ورکوي».
لیبرمن ویلي، ایران اوس د خپلو دفاعي او پوځي وړتیاوو د پیاوړتیا په حال کې دی او هستهییز فعالیتونه یې بېرته پیل کړي دي او په خبره یې له همدې امله مخکښو هېوادونو د ایران پر ضد د بندیزونو د فعالولو میکانیزم بیا کارولی دی.
د اسرائيل پخواني دفاع وزير همدا راز ويلي، چې دا ځل د ایران مشرتابه هڅه کوي، چې اسرائیل له ناڅاپي برید سره مخ کړي.