د افغان حکومت وياند مولوي ذبيح الله مجاهد وايي، د افغان حکومت د مشرتابه په حکم یو لړ ټاکنې شوي، چې له مخې یې د نیمروز ولایت مخکنی والي شیخ محمد قاسم خالد، د کورنیو چارو وزارت د نشهیي توکو پر وړاندې د مبارزې د معین په توګه او حاجي محمد وزیر بادشاه، د کورنیو چارو وزارت د تامیناتو معین په توګه ټاکل شوي.
دغه راز د کورنیو چارو وزارت د نشهیي توکو پر وړاندې د مبارزې مخکنی معین ملا عبدالحق همکار، د ټولګټو وزارت د مالي او اداري معین په توګه او د بادغیس ولایت مخکنی والي حافظ محمد امین جان عمري، بيا د مخابراتو او معلوماتي ټکنالوژۍ وزارت د مالي او اداري معین په توګه وټاکل شول.
په ټاکنو کې د خوست ولایت مخکنی والي مولوي عبدالقیوم روحاني، د ۲۰۳منصوري قول اردو د قومندان او د مخابراتو او معلوماتي ټکنالوژۍ وزارت مخکنی مالي او اداري معین ملا محمد حنیف حمزه، د بادغیس ولایت د والي په توګه ټاکل شوي دي.
د ۳۱۳ مرکزي قول اردو مخکنی رئیس ارکان مولوي عبدالمنان محمود د نیمروز د والي، د کورنیو چارو وزارت د تامیناتو مخکنی معین مولوي عبدﷲ مختار، د خوست د والي او د ۲۰۳ منصوري قول اردو مخکنی قومندان قاري محمد اسماعیل راسخ، د جوزجان د امنیه قومندان په توګه ټاکل شوي دي.
دغه راز بيا د زابل ولایت مخکنی مرستیال مولوي محب ﷲ حماس، د ننګرهار ولایت د امنیه قومندان، د میدان وردګ ولایت مخکنی مرستیال حافظ سید الرحمن،د زابل ولایت د مرستیال او د ننګرهار ولایت مخکنی امنیه قومندان ملا فرید ﷲ قیام د میدان وردګ ولایت د مرستیال په توګه ټاکل شوي.
په ټيټه کچه بيا د لوګر ولایت د سرحدونو او قبائلو چارو مخکنی رئیس مولوي سردار محمد مدني، د غزني ولایت د مرستیال، د جوزجان مخکنی امنیه قومندان مولوي عبدالستار صابر، د ۳۱۳مرکزي قول اردو د رئیس ارکان او د غزني ولایت مخکنی مرستیال حافظ عبدالرشید، د خوست د ښاروال په توګه ټاکل شوي.