د پاکستان مشهور ارواپوه او د ټولنيزو رسنيو فعال راشهزاده په خپله اېکس پاڼه ليکلي، چې «طالبان» چې اوس مهال له پراخو بنديزونو سره مخ دي؛ خو ناڅاپه یې په انګلیسي ژبه یو ستر رسنيز کمپاین په انلاین او ټولنیزو رسنیو کې پر لاره اچولی او هره شېبه پر لیکه د دوی مواد خپرېږي.
هغه همداراز پاکستان کې روانو کړکېچونو او د پوځ او ولس ترمنځ پيدا شوې کرکې ته په اشارې ليکلي، چې اوس مهال زموږ جګړه له افغانستان سره روانه ده، او ویل کېږي چې په جګړه کې تر ټولو مهم شی د ملت یووالی وي.
نوموړی زياتوي «که د ټولنیزو رسنیو د هر پلټفارم د منځپانګې تحلیل وشي، نو به ووینو چې د پاکستان د دولت او پوځ پر ضد څومره منځپانګه یا مواد تولیدېږي، چې دا یو اندېښمنوونکی حالت دی.»
د هغه په نظر جګړه یوازې په سنګرونو کې نه کېږي، او دا ځل افغان لوری په جګړه او رسنيو دواړو کې له پوره چمتووالي سره پر مخ ځي.
د راشهزداه په خبره له نړیوالو رسنیو نیولې تر ټولنيزو رسنیو پورې هر ځای چې ګورې د دوی مواد او بیانیې په مخ درځي.