د صنعت او سوداګرۍ وزارت په يوه خبرپاڼه کې وايي، چې د دې وزارت وزیر نورالدین عزیزي هند ته د خپل سفر په ترڅ کې په نوي ډهلي کې له پراګتي میدان نړیوال نندارتون او د افغانستان د نندارتوني شرکتونو له غرفو څخه لیدنه کړې ده.
د سرچينې په خبره ښاغلي عزيزي په دې لیدنه کې د هند د سوداګرۍ پراختیا له مشرتابه سره د افغان شرکتونو لپاره د ساحې ځانګړې کولو، افغان ګډونوالو ته د ویزې د ورکړې په برخه کې اسانتیاوو، په کابل او هند کې د افغان ـ هند ګډ نندارتون جوړولو او د همکاریو کچې د پراختیا په اړه خبرې کړې دي.
ياده دې وي، چې د صنعت او سوداګرۍ وزير پرون ورځ هند ته تللی او ټاکل شوې له يو شمېر هندي چارواکو سره به د افغانستان او هند ترمنځ د سوداګريزو او نورو اړيکو د پياوړتيا په موخه وګوري.