د کډوالو ستونزو ته د رسېدنې عالي کمېسیون وايي، چې پرون (چهارشنبه) له بېلابېلو لارو هېواد ته ۵۸۵ کورنۍ چې د غړو شمېر یې ۳زره ۲۹۴ تنو ته رسېږي هېواد ته راستنې شوې دي.
د یاد کمېسیون د خبرپاڼې له مخې، تېره ورځ ۶۴۹ راستنو شويو ته سيمکارتونه وېشل شوي، ۸۸ کورنۍ خپلو سيمو ته لېږدول شوې او سلګونو کورنيو ته مرستې وېشل شوې دي.
د ویلو ده، چې له تېرو څو کلونو راهیسې له ګاونډیو هېوادونو څخه د افغان کډوالو جبري را ایستل په بېسارې توګه زیات شوي دي.
افغان حکومت تر دې وړاندې له دغو هېوادونو غوښتي چې د افغانانو د اخراج پر مهال د هغوی حقوقو ته پام وکړي او ډاډ یې ورکړی، چې تر دې دمه یې د راستنېدونکو بهیر په ښه ډول مدیریت کړی دی.