د عامې روغتیا وزارت د روغتیایي خدمتونو وړاندې کولو مرستیال، مولوي عبدالولي حقاني قطر ته د خپل سفر په ترڅ کې افغانستان لپاره د فرانسې له شارژدافیر سره کتلي.
د عامې روغتیا وزارت ویاند ویلي، چې دې کتنه کې د افغانستان د روغتیايي سکتور پر روانو اړتیاوو، لاسته راوړنو او د دوه اخیزو همکاریو پر پیاوړتیا خبرې شوې دي.
ښاغلي حقاني د افغانستان روغتیايي سکتور لپاره د اوږد مهاله ملاتړ او په ځانګړي ډول د «FMIC» روغتون په چوکاټ کې د تخنیکي همغږۍ د لا پیاوړتیا غوښتنه کړې ده.
دې لېدنه کې چې پر مهال یې قطر کې افغان سفیر هم حضور درلود دغه راز د افغان ډاکټرانو پر ظرفیت لوړونې، مسلکي پرمختګ او افغانستان ته د فرانسوي ډاکټرانو پر لېږد هم خبرې شوې دي.
له بل لوري، د فرانسې شارژدافیر د افغانستان د روغتیايي سکتور د ملاتړ په اړه د خپل هېواد پر ژمنتیا ټینګار کړی او ویلي یې دي، چې فرانسه به د «FMIC» له لارې خپلو همکاریو ته دوام ورکړي.