افغاني سره میاشت وایي، پر سوري زړه رنځ اخته ۱۵ تنه ناروغان، چې په کور دننه یې درملنه ناشونې ده، په ازمايښتي ډول د درملنې په موخه هند ته استول کېږي.
د یادې ټولنې رئیس، شیخ شهاب الدین دلاور د بهرنۍ درملنې په موخه د سوري زړه لرونکو ناروغانو د ازمايښتي بهیر پر پیل خوښي ښودلې او زیاته کړې یې ده، چې په کور دننه هم له ۱۱ روغتونونو سره د یادو ناروغانو د درملنې قراردادونه لري.
ښاغلي دلاور ډاډ ورکړی، چې د افغاني سرې میاشتې له لوري په کابل کې د زړه د یوه معیاري روغتون د جوړېدو چارې تر ډېره بشپړې شوي او نږدې راتلونکي کې به یې پرانسته وشي.
د یادونې وړ ده، چې په لومړي پړاو کې درې ناروغان هند ته استول شوي او پاتې ۱۲ تنه نور به هم نږدې راتلونکي کې په بېلابېلو پړاوونو کې واستول شي