امريکا کې د سعودي عربستان پخواني سفير، ترکي الفيصل ويلي، چې که چېرته د اسرائیلو هغه پلان بریالی شوی وای چې د سعودي عربستان او ايران ترمنځ جګړه رامنځته کړي، نو ټوله سیمه به له پراخې ویجاړۍ او بېثباتۍ سره مخ شوې وای.
نوموړي په خپلو څرګندونو کې ویلي، دا ډول جګړه به یواځې د سیمې د هېوادونو لپاره يو ناورین نه وای، بلکې زرګونه ځوانان او ملکي وګړي به پکې وژل شوي وای، حال دا چې خليج هېوادونو به هېڅ ګټه نه وه ترلاسه کړې.
د هغه په وینا، اسرائیل غوښتل د سیمې د هېوادونو ترمنځ اختلافات ژور کړي، څو په منځني ختیځ کې د خپلې سیاسي او پوځي ارادې د تحمیل زمینه برابره کړي او د سیمې یواځينی غالب لوبغاړی پاتې شي.
ترکي الفیصل د سعودي ولیعهد دریځ هم ستايلی او ویلي یې دي، چې هغه اجازه ورنه کړه څو خلیج هېوادونه سره ووېشل شي او د سیمې وضعیت لا پسې ترینګلی کړي.
نوموړي ټینګار کړی، چې د سیمې د هېوادونو ترمنځ تفاهم او همغږي د هر ډول احتمالي بحران د مخنیوي لپاره مهمه ده.