د ریاستالوزراء اقتصادي معاونیت وایي، د افغان انویسټ خصوصي شرکت مسئولینو ویلي، د شبرغان-دشتالوان د ۵۰۰ کیلوولټ د برښنا لین غځولو او د دشتالوان د سبسټېشن د پراختیا چارې بشپړېدو ته نږدې شوي دي.
دوی دغه څرګندونې نن (چهارشنبه) د ریاستالوزراء له اقتصادي مرستیال سره کتنه کې کړي او ویلي یې دي، چې یاده پروژه به په راتلونکو څلورو میاشتو کې ګټې اخیستنې ته وسپارل شي.
د افغان انویسټ خصوصي شرکت مسئولینو زیاته کړې، چې د غور ولایت د تولک ولسوالۍ د سرب او جستو کان د دویم بلاک په اکتشافي چارو کې هم پرمختګ شوی او ژمن دي، چې پاتې چارې به یې د افغان او بهرنیو متخصصینو پرمټ په ټاکلي وخت بشپړې کړي.
په ورته مهال ښاغلي برادر د دغه شرکت هڅې ستایلي او ټینګار یې کړی، چې د یاد کان د اکتشاف ترڅنګ د سل سلنه پروسس لپاره د فابریکې پر جوړولو او ورته د اړتیا وړ برښنا برابرولو چارې هم پيل کړي.
د ریاست الوزراء اقتصادي مرستیال دغه راز یاد شرکت ته له خپل لوري د بشپړې همکارۍ ډاډ هم ورکړی دی.