د ریاستالوزرا اقتصادي معاونیت وايي، چې ملا عبدالغني برادر په کابل کې د قزاقستان د ولسمشر له مرستیال او د اقتصاد له وزیر سریک ژومانګارین سره کتلي دي.
د سرچينې په خبره ملا برادر د دواړو هېوادونو ترمنځ د اقتصادي همکاریو د پراختیا لپاره د لوړپوړو چارواکو سفرونه مهم بللي دي. قزاقي لوري ویلي، هرات ته د قزاقي اوړو د لېږد لپاره د ترانسپورټ سبسایډۍ ورکولو ته چمتو دي.
همدارنګه، په کابل کې د قزاقستاني درملو د پلور څانګې او د سوداګرۍ خونې د پرانیستلو پلان هم لري.
ژومانګارین ویلي، هېواد یې په افغانستان کې د کانونو، کیمیاوي سرې تولید او د مزارشریف ـ هرات ـ کندهار ـ سپین بولدک د اوسپنې پټلۍ پروژې په برخو کې همکارۍ ته چمتو دی.