د افغانستان دفاع وزارت وايي، د هېواد هوايي ځواکونو د بلوچستان د پشین ولسوالۍ د سرانانو په سیمه کې د داعش ډلې او د «شر او فساد» پر یوه ګډ مرکز هوايي برید کړی دی.
د وزارت په وینا، له دغه مرکز څخه په افغانستان کې د تخریبي فعالیتونو او بریدونو پلانونه جوړېدل او د هغو بمباریو همغږي هم ترې کېده چې ملکي وګړي پکې په نښه کېدل.
دفاع وزارت همدارنګه ویلي، چې د خیبرپښتونخوا په قمبرخېلو سیمه کې د داعشیانو پر یوه مرکز او د چترال د شاه سلیم درې اړوند د ګرم چشمو په سیمه کې د داعشیانو او «شر او فساد» پر یو بل ګډ مرکز هم بریالي هوايي بریدونه ترسره شوي دي.
د وزارت د معلوماتو له مخې، په دغو بریدونو کې داعشیانو، د «شر او فساد» غړو او د هغوی ملاتړو ته درانه ځاني او مالي زیانونه اوښتي دي.
وزارت زیاتوي، بریدونه په ټاکلو هدفونو په ډېر دقت ترسره شوي او ملکي وګړو ته پکې هېڅ ډول زیان نه دی اوښتی.
د دفاع وزارت ټینګار کړی، چې د افغانستان هوايي دفاعي ځواکونه به هر هغه ځای په نښه کړي چې د افغانستان د امنیت د اخلال لپاره ترې استفاده کېږي.