راپورونه وايي، د اروپا په بېلابېلو هېوادونو کې د سختې ګرمۍ څپې ۱۵۰ میلیونه کسان اغېزمن کړي دي.
د راپورونو له مخې، د سختې ګرمۍ له امله په هسپانیا کې ۱۰۲۸ او په فرانسه کې نږدې ۱۰۰۰ اضافي مړینې ثبت شوې دي.
روغتیايي چارواکي وایي، د تودوخې لوړې درجې په ځانګړي ډول پر زړو کسانو، ماشومانو او هغو کسانو چې اوږدمهاله ناروغۍ لري، سخت اغېز کړی دی.
سږ کال د ګرمۍ څپې د اروپا پراخې سیمې تر اغېز لاندې راوستې او په ډېرو هېوادونو کې د تودوخې نوي ریکارډونه ثبت شوي دي.
په فرانسه، هسپانیا، ایټالیا، جرمني، پرتګال، پولینډ او یو شمېر نورو هېوادونو کې په ځینو سیمو کې تودوخې درجه له ۴۰ سانتيګرادو لوړه شوې ده.