د المپیک، بدني روزنې او ورزش عمومي رئیس مولوي احمدالله وثیق د اسد ۲۴مې د پنځمې کلیزې په مناسبت جوړې شوې ورزشي او ولسي غونډې ته وویل، د اسد ۲۴مه د افغانستان په معاصر تاریخ کې هغه مهمه ورځ ده چې د ډېرو سترو قربانیو او سرښندنو وروسته ترلاسه شوې ده.
مولوي احمدالله وثیق زیاته کړې، د آزادۍ ورځ دا پیغام لري، چې د افغانستان مجاهد ولس د خپلو دیني مقدساتو د ساتنې لپاره هر ډول قربانۍ ته چمتو دی.
د المپیک، بدني روزنې او ورزش عمومي رئیس وویل، په دې مناسبت زرګونه ورزشکاران راټول شوي او د ورزشي او ولسي نندارو له لارې دا تاریخي ورځ نمانځي.
نوموړي د ورزش ادارې له ټولو مسؤولینو څخه هم مننه وکړه، چې د اسد ۲۴مې د نمانځلو لپاره یې د دې سترې ورزشي غونډې په برابرولو کې هڅې کړې دي.