العربیه فارسي راپور وکری، چې د امریکا ولسمشر ډونالډ ټرمپ ویلي، چې په اوسنیو شرایطو کې له ایران سره خبرې اترې د «وخت ضایع کول» دي او واشنګټن دا مهال له تهران سره هېڅ مستقیمه مذاکره نه کوي.
ټرمپ ویلي، ایران لا هم د جګړې یو څه وړتیا لري، خو د هغه په وینا، د دغه هېواد پوځي توان د پخوا په پرتله کمزوری شوی دی.
بلخوا، امریکايي چارواکي وايي، د هرمز تنګي په جنوبي برخه کې د تېلو د لېږد لپاره یو سمندري دهلېز جوړ شوی، چې له لارې یې هره ورځ شاوخوا ۱۵ تر ۲۰ پورې د تېلو ټانکرونه تېرېږي. د چارواکو په وینا، د دغه مسیر له لارې د ورځې نږدې ۱۰ میلیونه بېرله تېل لېږدول کېږي.
امریکايي چارواکي ادعا کوي، چې د هرمز تنګي جنوبي مسیر شاوخوا دوه میاشتې کېږي د امریکا تر کنټرول لاندې دی او امریکايي جنګي الوتکې د دغه سمندري دهلېز پر سر هوايي پوښښ برابروي او د ایران توغندي او بېپیلوټه الوتکې څاري او شنډوي.