الجزیرې راپور ورکړی، چې د هرمز تنګي د ماینونو د بشپړ پاکولو په اړه د امریکا د ولسمشر ډونالډ ټرمپ ادعا له پوښتنو سره مخ شوې او کارپوهان وايي، د کښتۍ چلوونې د اصلي مسیرونو پاکول په دې معنا نه دي، چې ټول تنګی له ماینونو پاک شوی دی.
د راپور له مخې، که څه هم د کښتۍچلوونې د اصلي او تر څار لاندې مسیرونو د ماینپاکولو په اړه د امریکا ارزونه د منلو وړ کېدای شي، خو لا هم امکان شته چې له دغو مسیرونو بهر ځینې سرګردانه ماینونه پاتې وي.
الجزیرې د کارپوهانو له قوله ویلي، ایران لا هم د نورو ماینونو د ځای پر ځای کولو وړتیا لري او ماینونه د هرمز تنګي له لارې د تېرېدونکو بېړیو لپاره یوازینی ګواښ نه دی.
د راپور له مخې، د اوربند د روښانه هوکړې د نشتوالي له امله لا هم د جګړې د بیا پیل احتمال شته، چې له کبله یې د هرمز تنګي له لارې د سوداګریزو بېړیو د تګ راتګ وضعیت له ناڅرګندتیا سره مخ دی.