د ایران د بهرنیو چارو وزارت ویاند اسماعیل بقايي د ملګرو ملتونو د سرمنشي انتونیو ګوترش د څرګندونو په غبرګون کې پر خپله اېکس پاڼه لیکلي، چې د دغه سازمان د ماموریت محدودول یوازې د ابرقدرتونو ترمنځ د جګړې مخنیوي ته «ګمراه کوونکی او خطرناک» تعبیر دی.
بقايي ویلي، ملګري ملتونه باید د لویو قدرتونو د جګړو د مخنیوي ترڅنګ د کوچنیو هېوادونو د امنیت ساتنې لپاره هم فعال رول ولري. هغه ټینګار کړی چې د ملګرو ملتونو د منشور د دویمې مادې د څلورم بند محدود تعبیر ډېری غړي هېوادونه له پامه غورځوي او د بېلابېلو جګړو د توجیه زمینه برابروي.
نوموړي د کوریا، ویتنام، کانګو، عراق، افغانستان، یمن، سوډان او غزې جګړو ته په اشارې ویلي، که معیار یوازې د ابرقدرتونو ترمنځ د جګړې نه رامنځته کېدل وي، نو دا ټولې جګړې به «بریاوې» وبلل شي.