د امارتي شرکتونو عمومي ریاست په یوه خبرپاڼه کې ویلي، چې د افغان پُست اجرائیوي رئیس مولوي رحمتالله مکي د آسیا ـ پسفیک پُستي اتحادیې (APPU) د ۱۴م کنګرې په څنډه کې د چین، مالیزیا او بنګلهدېش د پُستي ادارو له مسوولینو سره په جلا لیدنو کې د پُستي خدمتونو د پراختیا او ګډو همکاریو پر پیاوړتیا خبرې کړې دي.
د معلوماتو له مخې، په دغو لیدنو کې د پُستي خدمتونو د کیفیت ښهوالي، نړیوالو پارسلونو، اکسپرېس او لوژستیکي خدمتونو، برېښنايي سوداګرۍ او د پُستي تبادلاتو په برخو کې د تجربو شریکولو او د همکاریو پر پراختیا بحث شوی دی.
دواړو لورو همدارنګه د پُستي تبادلاتو پر مهال د شته ستونزو او ننګونو په اړه خبرې کړي او د دغو ستونزو د حل، د پُستي خدمتونو د اسانه کولو او د تبادلاتو د لا منظمېدو لپاره یې د ګډې همکارۍ پر پیاوړتیا ټینګار کړی دی.