کله ناکله د یوه بهیر د پېژندلو لپاره د دښمنانو افشاګرۍ ته اړتیا نه وي؛ بس دومره کافي ده چې د همدې بهیر له دننه څخه یو غږ پورته شي او د پردې تر شا روانې چارې د هغو کسانو له خولې بیان شي، کومو چې خپله په دې بهیر کې حضور درلودلی.
د «هندوکش غږ» له لوري په خپرو شویو کلیپونو کې د آزادۍ په نوم جبهې له دننه څخه داسې روایتونه رااخیستل شوي چې یو شمېر بېوزله افغان کډوال په پاکستان کې د میاشتني ۲۵۰ ډالرو معاش په ژمنه جذب او پاکستان ته بېول شوي دي؛ خو کله چې هغوی هلته رسېدلي، د د معاش درک نشته، بلکې د فشار، شکنجې او حتی پر هغوی د جاسوسۍ د تورونو خبره شوې ده.
دغه روایتونه د دې بهیر بل مخ څرګندوي؛ داسې مخ چې د افغانانو فقر او مجبوریت په کې، د سیاسي مخالفینو د موخو د پرمخ وړلو په وسیله بدل شوی دی.
د افغانستان د حکومت مخالفې ډلې، چې په دې وروستیو کې په ښکاره توګه د پاکستان د ګټو د خوندیتوب په وسیلو بدلې شوې دي، هڅه کوي د افغانستان د خلکو له مجبوریت او بېوزلۍ څخه په ګټې اخیستنې هغوی د خپلو سیاسي موخو لپاره د سون توکو په توګه وکاروي؛ هغه موخې چې پوره کېدل یې د پاکستان د استخباراتي ادارې(آی ایس آی) د سیاسي او استخباراتي ګټو له تأمین سره تړلي دي.
افغانستان له کلونو راهیسې له بېوزلۍ، بېکارۍ او کډوالۍ سره لاس او ګرېوان دی. د تېر رژیم پر مهال زرګونو ځوانانو د ناامنۍ له وېرې یا د یوې مړۍ ډوډۍ د پیدا کولو لپاره خپل کورونه او هېواد پرېښودل او ګاونډیو هېوادونو ته ولاړل. که څه هم له دې افغانانو څخه یو شمېر یې د اوسني حکومت له واکمنېدو او په ټول هېواد کې د سرتاسري امنیت له ټینګېدو وروسته بېرته هېواد ته راستانه شوي، خو هغه کسان چې لا هم پاتې دي یا وروسته کډوال شوي، نن د حکومت مخالفو ډلو له لوري په غوړو او دروغجنو ژمنو او د هغوی له مجبوریت څخه په ګټې اخیستنې، د جنګیالیو په توګه د جلبولو لپاره پاکستان ته بېول کېږي.
حقیقت دا دی چې د دې تښتېدلو څېرو له لوري د افغانستان د خلکو له برخلیک سره لوبې کول او له مجبوریت څخه یې ناوړه ګټه اخیستل کومه نوې خبره نه ده؛ بلکې دا د هغوی پخوانی خوی او همېشنی عادت دی.
هغوی په تېر کې هم د دروغجنو شعارونو، پر خپلو مخالفینو د تورونو لګولو، د عجیبو او بې اساسه ټاپو وهلو، د خلکو د پاکو احساساتو د راپارولو او قومي او نژادي تعصبونو ته د لمن وهلو له لارې خلک د خپلو سیاسي موخو لپاره کارول. اوس هم د خپلو سیاسي موخو د ترلاسه کولو او د خپل بادار یعنې پاکستان د ګټو د خوندیتوب لپاره د خلکو له بېوزلۍ او مجبوریت څخه ګټه اخلي.
هغه څه چې دوی په رسنیو کې شعارونه ورکوي او ادعا کوي چې ګواکې د خلکو د ګټو لپاره مبارزه کوي، دا له دروغجنو شعارونو او د خپلو پلویانو په سترګو کې له خاورې شیندلو پرته بل څه نه دي. له نېکه مرغه، د دې جبهو یو شمېر اړوند کسان هم په دې حقیقت پوه شوي او نن یې زړه کړی، د خپلو مشرانو له لوري د خلکو له برخلیک سره د سیاسي سوداګرۍ په اړه اقرار او اعتراف کوي.
یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.