د ریاستالوزراء اقتصادي معاونیت په یوه خبرپاڼه کې ویلي، چې د ملا عبدالغني برادر اخوند په مشرۍ د قتصادي کمېسیون په نوبتي غونډه کې د داخلي معیارونو ۶۶ مسودې تایید شوي، چې ۳۶ معیارونه او ۳۰ د ازمایښت طریقې پکې شاملې دي.
د ریاستالوزراء اقتصادي معاونیت وایي، یاد معیارونه د کرنیزو محصولاتو، خوراکي توکو، درملو، نساجۍ، کیمیا او پلاستیک، مخابراتو او برېښنا، کانکېندنې، ساختماني موادو، چاپېریال ساتنې او نورو برخو پورې تړاو لري.
په غونډه کې په پکتیا، پکتیکا، خوست، کندهار او ننګرهار ولایتونو کې د ډبرو سکرو د تخلیې، بارګیرۍ، پروسس او بستهبندۍ مرکزونو د مالکیت په اړه هم پرېکړه شوې، چې یاد مرکزونه د ترانسپورټ او هوايي چلند وزارت اړوند دي او دغه وزارت به یې چارې پرمخ وړي، په داسې حال کې چې په ګمرکونو کې اړوندې چارې به د مالیې وزارت پر غاړه وي.
خبرپاڼه زیاتوي، چې د غونډې پرېکړې د نهايي تصمیم نیونې لپاره د افغان حکومت د مشرتابه دفتر ته استول شوې دي.