د بهرنیو چارو وزارت ویاند عبدالقهار بلخي ویلي، چې د افغان حکومت د مشرتابه او درېیو نورو مشرانو د نیولو په اړه د نړیوالې جنايي محکمې د پرېکړې په نوم اقدام په کلکو ټکو ردوو او دا د افغانستان د ملي حاکمیت، خپلواکۍ او د دولتونو په کورنیو چارو کې د نهلاسوهنې د اصولو ښکاره نقض دی.
ښاغلي بلخي پر خپله اېکس پاڼه لیکلي، د نړیوالې جنايي محکمې په نوم د یاد جوړښت پرلهپسې انتخابي او سیاسي چلند او د نړیوالو قضايي صلاحیتونو د سیاسي موخو لپاره د کارولو هڅو د دغه جوړښت د بېطرفۍ او اعتبار په اړه جدي پوښتنې راولاړې کړې دي.
نوموړي ټینګار کړی، چې افغان حکومت له یاد جوړښت سره هېڅ ډول همکاري او تعامل نه لري او د افغانستان په اړه یې هر ډول قضايي صلاحیت په صراحت ردوي.
د نوموړي په وینا، افغانستان د دغه جوړښت غړی نه دی او له پخوانۍ ادارې سره یې پخوانی تړاو، چې د بهرني اشغال تر سیوري لاندې رامنځته شوی و، د اوسني خپلواک افغانستان لپاره هېڅ حقوقي اعتبار نه لري.