د يمن د انصار الله غورځنګ وياند، یحیی سريع د دوی پر وړاندې د سعودي عربستان له ملاتړ د برخمنو ځواکونو عملياتو کې حوثیانو ته د اوښتو تلفاتو په اړه خپاره شوي ارقام په کلکه رد کړي دي.
نوموړي ويلي، دوی ته په هغه اندازه تلفات نه دي اوښتي لکه څومره چې په رسنيو کې تبلیغات کېږي.
هغه زياته کړې، چې تېرو ساعتونو کې یې د رأس العاره او السقیا په سیمو کې په سعودي پلوه ځواکونو لسګونه بریدونو کړي، چې په ترڅ کې یې له ۲۰۰ ډېر منسوبین وژل شوي یا ټپیان دي.
سريع ويلي «زموږ ځواکونه لا هم د جګړې په ډګر کې د خپلو ټولو لاسته راوړنو کنټرول په لاس کې لري او د دښمن له لوري د جګړې وضعیت په اړه خپرېدونکي معلومات یوازې “خیالي بریاوې” دي چې د خپلو ملاتړو د رضایت ترلاسه کولو لپاره وړاندې کیږي.»
د يادونې وړ ده، چې د سعودي عربستان له ملاتړ برخمن د يمن حکومتي ځواکونو ويلي له پرون ورځې راهیسې یې د حوثيانو له ۱۲۰۰ ډېرو وسله والو ته مرګ ژوبله اړولې ده.