د معیار او کیفیت ادارې ویلي، چې د اسلامکلا بندر له لارې یې د ۱۴۹ ټنه او ۴۸۰ کیلوګرامه بېکیفیته وارداتي توکو د څو محمولو مخه نیولې او بېرته یې صادرونکي هېواد ته ګرځولي دي.
د یادې ادارې د معلوماتو له مخې، په مسترد شویو توکو کې ۲۶ زره او ۸۰۰ کیلوګرامه کاشي، ۲۳ زره او ۷۱۰ کیلوګرامه جامې، ۳۱ زره او ۶۵۰ کیلوګرامه نبشي اوسپنه، ۴۷ زره او ۳۰۰ کیلوګرامه ګاډر، ۲۳ زره او ۶۴۰ کیلوګرامه د بالښتونو او توشکو پوښونه او ۶ زره او ۳۸۰ کیلوګرامه برېښنايي جاروګان شامل دي.
سرچینې زیاته کړې، چې دغه محمولې د مسلکي کارکوونکو له لوري له اړینو ازموینو وروسته له کورنیو معیارونو سره د نه مطابقت له امله د هېواد بازارونو ته له داخلېدو منع او بېرته صادرونکي هېواد ته مستردې شوې دي.
یادې ادارې ټینګار کړی، چې د وارداتي توکو د کیفیت کنټرول بهیر پراخوي، ترڅو د بېکیفیته او زیانرسوونکو توکو د واردېدو مخه ونیسي، د مصرفکوونکو حقونه خوندي او د ټولنې روغتیا وساتي.