عدلیې وزارت په یوه خبرپاڼه کې ویلي، چې د دغه وزارت او د زندانونو د چارو د تنظیم ادارې ترمنځ د ماشومانو د اصلاح او تربیې مرکزونو (دارالتأدیب) د لېږد سند لاسلیک شو، چې له مخې به یې د دغو مرکزونو تشکیلات، صلاحیتونه، کارکوونکي او اړوند امکانات عدلیې وزارت ته ولېږدول شي.
د خبرپاڼې له مخې، د لېږد په تړاو د تخنیکي کمېټې راپور هم وړاندې شوی او د مرکزونو د تشکیلاتو، بودجې، ودانیو، اسنادو او نورو امکاناتو د سپارلو په اړه لازمې پرېکړې شوي.
د مشرتابه د حکم له مخې، د ماشومانو د اصلاح او تربیې مرکزونو مسوولیت په مرکز او ولایتونو کې له زندانونو ادارې څخه عدلیې وزارت ته سپارل شوی او له دې وروسته به د دغو مرکزونو چارې د یاد وزارت له لوري مدیریت کېږي.