انادولو خبري اژانس راپور ورکړی، چې د غزې تړانګې په بېلابېلو سیمو کې د اسراییلي رژیم په تازه بریدونو کې یو فلسطینی شهید شوی او څلور نور ټپیان شوي دي.
د راپور له مخې، د غزې په مرکزي سیمه الزوایده کې د بېځایه شویو فلسطینیانو پر خېمه د بېپیلوټه الوتکې په برید کې ۲۷ کلن ځوان شهید شوی او یو بل کس سخت ټپي شوی دی.
همدارنګه، د غزې په شمال کې د الکرامه سیمې پر یوه استوګنیزه ودانۍ د ډرون برید یو کس ټپي کړی او د خان یونس په شمال او ختیځ کې د ډزو له امله یوه ښځه او بل فلسطینی ټپیان شوي دي.
د غزې د روغتیا وزارت د شمېرو له مخې، د ۲۰۲۵ کال د اکتوبر په ۱۰مه د اوربند له هوکړې وروسته د اسراییلي رژیم په بریدونو کې ۱۶۰۲ فلسطینیان شهیدان شوي او ۵۷۹۴ نور ټپیان شوي دي. د وزارت په وینا، د ۲۰۲۳ کال د اکتوبر له اتمې راهیسې په غزه کې د اسراییلي رژیم په بریدونو کې د شهید شویو فلسطینیانو شمېر له ۷۴ زرو اوښتی او د ټپیانو شمېر نږدې ۱۷۵ زرو ته رسېدلی دی.