د تش په نوم مقاومت جبهې پخواني غړي عیسی محمدي د الله داد فدايي د پېښې په تړاو په یوه لیکنه کې ویلي، چې نوموړی د پاکستان پوځي رژیم د استخباراتي موخو قرباني شوی او د شخصي عقدو له امله د بهرنیو استخباراتي شبکو د ناوړه استفادې ښکار شوی دی.
محمدي په خپله لیکنه کې ویلي، چې د ځینو ستونزو له امله ځینې افغانان د پردیو استخباراتي شبکو د فریب او ناوړه استفادې په دام کې لوېږي.
نوموړي په ځانګړي ډول له پخوانیو نظامي چارواکو، جنرالانو، افسرانو او ځوانانو غوښتي، چې د مشکوکو مالي او سیاسي وړاندیزونو په منلو کې له بشپړ احتیاط څخه کار واخلي او د شخصي ستونزو له امله د افغانستان د خلکو او ملي ګټو پر وړاندې د نورو د موخو وسیله نه شي.
هغه ټینګار کړی، چې افغانستان د جګړو، بهرنیو لاسوهنو او سیمهییزو سیالیو له امله کافي قربانۍ ورکړې او نور باید د دې هېواد ځوانان او نظامي اشخاص د پردیو د پټو موخو قرباني نه شي.