د عامې روغتیا وزارت په یوه خبرپاڼه کې ویلي، چې د بغلان ولایت په ډنډغوري ولسوالۍ کې د ۵۸ میلیونه افغانیو په لګښت د یوه مجهز عمومي روغتون د جوړولو بنسټ ډبره کېښودل شوه.
د عامې روغتیا وزیر مولوي نورجلال جلالي د دغه روغتون د بنسټ ډبرې اېښودو پر مهال ویلي، چې روغتون به پر پنځه جریبه ځمکه جوړ او له اړینو روغتیايي امکاناتو به برخمن وي.
د نوموړي په وینا، د روغتون په جوړېدو سره به د ډنډغوري او شاوخوا سیمو د اوسېدونکو روغتیايي ستونزې کمې او روغتیايي خدمتونو ته به یې لاسرسی اسانه شي.
هغه زیاته کړې، چې عامې روغتیا وزارت په ټول هېواد کې د ۳۱۸ ولسوالیو لپاره د عمومي روغتونونو د جوړولو لړۍ پیل کړې ده.