د کورنیو چارو وزارت پخوانی معین هارون شیرزاد له یاسین ضیا، سمیع سادات، امرالله صالح، احمد مسعود او نورو هغو کسانو غوښتي چې ځانونه د افغانستان پر وړاندې د وسلهوال مقاومت(!) استازي ګڼي، د پردیو د ګټو لپاره دې د خپل هېواد او ولس پر ضد فعالیتونه نه کوي.
شیرزاد په یوه خپاره کړي پیغام کې ویلي، چې د پردیو استخباراتي شبکو له خوا استخدامېدل او جاسوسي کول ستونزمن کار نه دی، خو دا چاره د انسان اخلاقي سقوط او د خپل وطن، ولس او ملي حیثیت پر وړاندې د دریځ نیولو په مانا ده.
نوموړي د تېرو پنځوسو کلونو جګړو ته په اشارې ویلي، چې په دې موده کې ګڼو د دوی مشرانو د بهرنیو هېوادونو په ملاتړ جګړې کړې او د پردیو د ګټو لپاره یې خپل ولس قرباني کړی، خو په وینا یې، پایله یې د سیاسي حیثیت او ملي اعتبار له لاسه ورکول وو.
هارون شیرزاد ټینګار کړی، چې د تېرو جګړو تجربې باید تکرار نه شي او یادو کسانو ته یې سپارښتنه کړې چې د قدرت او سیاسي موقف لپاره دې د خپل وطن، ولس او خپل نوم د قربانولو پرېکړه نه کوي.
نوموړي زیاته کړې، چې سیاسي موقفونه او قدرتونه له منځه ځي، خو د خیانت داغ د انسان پر ټنډه د تل لپاره پاتې کېږي.