د مالیې وزارت خبر ورکړی، چې د دې وزارت وزیر ملا محمد ناصر اخوند د یوه پلاوي په مشرۍ په رسمي سفر ایران ته ولاړ.
د معلوماتو له مخې، نوموړی د ایران د کرنې وزیر په رسمي بلنه دغه هېواد ته سفر کړی او ټاکل شوې چې د سفر پر مهال له بېلابېلو ایراني چارواکو سره د دوه اړخیزو اقتصادي، سوداګریزو او ګمرکي همکاریو په اړه خبرې وکړي.
سرچینه زیاتوي، په دې سفر کې به د افغانستان او ایران ترمنځ د دوه اړخیز اقتصادي کمېسیون د راتلونکې غونډې لپاره پر مهمو موضوعاتو هم بحث وشي.