د کورنیو چارو وزارت ویلي، چې د کندهار ولایت د احمدشاه بابا نړیوال هوايي ډګر سرحدي ځواکونو د ۱۵۹ تاریخي سکو د قاچاق مخه نیولې او دغه تاریخي اثار یې ضبط کړي دي.
د معلوماتو له مخې، یادې سکې د افغانستان د پخوانیو پاچاهانو، امانالله خان، نادرشاه او محمدظاهر شاه د واکمنیو دورو پورې تړاو لري، چې یوه کس غوښتل په قاچاقي ډول یې له هېواده بهر ولېږدوي، خو د هوايي ډګر امنیتي منسوبینو یې مخه نیولې ده.
د وزارت په وینا نیول شوی کس به له څېړنو وروسته له ضبط شویو تاریخي اثارو سره یوځای عدلي او قضايي ارګانونو ته وسپارل شي.