اریانا افغان هوايي شرکت په یوه خبرپاڼه کې ویلي، چې یاد شرکت د روان ۱۴۰۵ لمریز کال د قوس له لومړۍ نېټې څخه به د کندهار او دوبۍ ترمنځ مستقیمې الوتنې پیل کړي.
د دغه شرکت په خبرپاڼه کې راغلي، چې د دې مسیر د مستقیمو الوتنو په پیل سره به د کندهار اوسېدونکو او سوداګرو ته د تګ راتګ اسانتیاوې برابرې شي او مسافرین به وکولای شي په اسانه، ارزانه او خوندي توګه خپل مقصد ته ورسېږي.
د خبرپاڼې له مخې، د دغو الوتنو پیل به د مسافرینو د تګ راتګ ترڅنګ د سوداګرۍ، پانګونې، اقتصادي اړیکو او سوداګریزو فرصتونو د پراختیا لپاره هم نوې زمینه برابره کړي.
آریانا افغان هوايي شرکت ویلي، چې مسافرین کولای شي د دې مسیر ټکټونه د شرکت له مرکزي دفتر، رسمي نمایندګیو، سیاحتي شرکتونو او په هوايي ډګرونو کې د آریانا له کاونټرونو ترلاسه کړي.