مالیې وزارت ویلي، چې د یاد وزارت وزیر ملا محمد ناصر اخوند د خپل رسمي سفر په ترڅ کې د ایران د کرنې له وزیر او د دوه اړخیزو همکاریو اقتصادي کمېسیون له رئیس غلامرضا نوري قزلجه سره لیدلي دي.
د معلوماتو له مخې، په دې لیدنه کې د افغانستان او ایران ترمنځ د کرنیزو محصولاتو پر صادراتو، د ګمرکونو پر ۲۴ ساعته فعالیت، د افغان سوداګرو د ستونزو پر حل او د غیرقانوني توکو د قاچاق پر مخنیوي خبرې شوې دي.
سرچینه زیاتوي، دواړو لورو د دوه اړخیز اقتصادي کمېسیون د راتلونکې غونډې پر جوړېدو هم بحث کړی او د ایران د کرنې وزیر د کرنې، مالدارۍ او اوبو لګولو په برخو کې د همکاریو ډاډ ورکړی دی.