د متحدې جبهې په نوم د شر او فساد ډلې د مشر سمیع سادات او د یو تن مهم قوماندان عبدالبصير اڅکزي تر منځ تازه د اختلافاتو یوه بله څپه راغلې. عبدالبصیر اڅکزی چې په بصيرک مشهور دی او څه موده وړاندې ورته د سمیع سادات له خوا د بريد جنرالۍ خیالي رتبه هم ورکړل شوې وه، د دغه جبهې لپاره یو له مهمو قوماندانو شمېرل کېږي. په متحده جبهه کې دغه تازه درز په داسې حساس وخت کې رامنځ ته شوی چې هر ډول خپلمنځي ستونزې د دغه ډول نمایشي ډلو پاتې حیثیت هم له خاورو سره خاورې کوي.
دا اختلافات په اصل کې وروسته له هغه پیدا او زیات شوي دي، چې سمیع سادات د نوموړي پر سر د حاجي لالا په نوم یو بل کس د قوماندان په توګه وټاکه. د دې ګمارنې پر وړاندې بصيرک کلک مخالفت ښودلی او متحده عربي اماراتو ته تښتېدلی دی. د دغو تش په نوم ډلو بنسټونه پر شخصي سلیقو ولاړ دي او هیڅ قوماندان یې نه خوښوي چې تر بل دې وروسته پاتې وي.
په متحده جبهه کې د اختلافاتو یو بل مهم اړخ د نظامي مسلکيتوب او اصولو نشتوالی دی. کله چې یو کس ته د کومو قانوني او رسمي بنسټونو له تائید پرته، په خیالي توګه د شر و فساد د یوې وړې ډلې له خوا د برید جنرالۍ په څېر لوړې رتبې ورکول کېږي، نو طبیعي ده چې هلته به د صلاحیتونو او واک وېش د ځانګړو امتیازاتو په پلمه د شخړو سرچینه ګرځي. د دغه ډول خیالي رتبو توزیع نه یوازې د نظامي اصولو سپکاوی دی، بلکې د ډلې دننه یې د انحصار او بې باورۍ فضاء نوره هم پیاوړې کړې ده.
له دې سره سم، د دې اختلافاتو ناوړه پایلې د دغه جبهې ساده پلویانو او غولېدلو غړو ته رسېږي. د متحدې جبهې غړي چې لا تر اوسه یوازې په ناکامو تبلیغاتي هڅو توانېدلي دي او نه شي کولای نظامي تحرکات رامنځته کړي، ترمنځ یې اختلافات پیدا شوي او مشران یې یوازې د شخصي ګټو او امتیازاتو پلوي دي؛ له دې څرګندېږي چې تبلیغاتي هڅې به یې هم ورو ورو له منځه ځي، دغه ډله به هم د نورو په څېر د انشعاب ښکار کېږي او د ډلې پاتې غړي به یې یو- یو لار جلا کوي.
د دغو اختلافاتو دوام به دې ته لاره خلاصه کړي، چې د ډلې دننه پټې او ښکاره سیالۍ نور هم زور واخلي او د تبلیغاتو ټول شته ظرفیت یې په خپلمنځي دښمنیو مصرف شي. متحده جبهه اوس له دغه مسیر څخه تېرېږي، خو نورې مخالفې ډلې له دې مسیر تېرې شوې دي، چې اوس له لویو جبهو په کورنیو ډلو بدلې شوې دي او انشعابونو له سترو او هر اړخیزو ننګونو سره مخ کړې دي.