د حماس اسلامي غورځنګ د سیاسي دفتر لوړ پوړي غړي “اسامه حمدان” د لبنان پلازمېنه “بیروت” کې یوې خبري ناستې ته د خبرو پر مهال ویلي، چې د بندیانو د تبادلې په اړه تر هغې پورې خبرې نه شي کېدای، څو چې اسرائیلي پوځیان له غزې او اړوندو سیمو په بشپړه توګه نه وي وتلي.
نوموړي ویلي، چې د حماس استازو د تېرو ۲ ورځو خبرو په دوام کې د منځګړو هېوادونو استازو ته خپل شرایط وړاندې کړي دي.
هغه اسرائیل تورن کړي، چې خبرو اترو کې له چل او فریب څخه کار اخلي او هڅه کوي هغه څه یې، چې د جګړې په ډګر کې تر لاسه نه کړل له سیاسي لارو چارو یې لاسته راوړي.
د حمدان په خبره، قاهره کې به یې استازي د ښه نیت ښودلو او د منځګړو هېوادونو د غوښتنې لپاره پاتې وي، خبرو اترو ته به دوام ورکوي؛ خو ټینګار یې کړی، چې اسرائیل، امریکا او نور هېوادونه به هیڅکله هم خپلو شومو موخو ته و نه رسېږي.
نوموړي یادې څرګندونې په داسې حال کې کړي، چې اوس مهال د ځینو منځګړو هېوادونو په هلو ځلو د مصر په پلازمینه “قاهره” کې اسرائیلو سره د ممکنه اوربند په هکله خبرې روانې دي.
د ویلو ده، چې د حماس دغه لوړ پوړي غړي یوځل بیا ټینګار کړی، چې غزه کې د حماس او نورو مقاومتي ډلو د ځواکونو مورال غښتلی دی، له خپل ولس دفاع ته ژمن دي، اسرائیلي ځواکونو ته یې په تېرو ۴ میاشتو کې درانه ځاني او مالي زیانونه اړولي او اشغالګر له غزې نه د تېښتې هڅه کوي.