د افغانستان برېښنا شرکت وايي، له دوه کلن ځنډ وروسته نړیوال بانک په افغانستان کې د کاسا ۱۰۰۰ پروژې چارې بیا پیلوي.
له یاد شرکت څخه په خپره شوې خبرپاڼه کې ویل شوي، دغه پروژه د افغانستان اسلامي امارت او برېښنا شرکت په هڅو او د سیمې هېوادونو په همکارۍ د نړیوال بانک له لوري بیا پیلېږي.:« له قرغیزستان څخه د افغانستان له لارې پاکستان ته د برېښنا انرژۍ لېږد تر ټولو سترې پروژې (کاسا۱۰۰۰) بیا پيل په اړه د ترکیې په استانبول ښار کې د نړیوال بانک، افغانستان, قرغیزستان, تاجېکستان او پاکستان استازو تر منځ گډه ناسته وشوه.
په دغه ناسته کې د افغانستان برېښنا شرکت استازي هم گډون کړی و او د برېښنا انرژۍ سوداگرۍ سیمهییز نښلون دې سترې پروژې بیا پيل ته یې بشپړ چمتو والی وښود.»
د خبرپاڼې له مخې، د کاسا ۱۰۰۰ پروژې تاسیسات به په افغانستان کې د ۵۸۰ کېلومترو په اوږدوالي د کندوز له شېر خان بندر څخه د ننگرهار تر تورخم پورې بشپړېږي.: « ټاکل شوې له دوو کلونو ځنډ وروسته د برېښنا لېږد دا ستره پروژه د نړیوال بانک په مالي ملاتړ بیاځلې د ۱۴۰۳ لمربز کال غويي/ثور میاشت کې بیا پيل او د ۱۴۰۴ لمریز کال پای کې بشپړه شي، د دې پروژې چارې د نړیوال بانک له لوري د سیمې هېوادونو په غوښتنه او د افغانستان له لوري د چمتووالي او بشپړو شرایطو او ډاډمنتیا ښودلو سره بیا پيلېږي.»
د کاسا زر پروژې په مرسته قرغیزستان او تاجېکستان به د یو ۱۲۲۲ کیلومتره د انرژۍ انتقال لیکې پرمټ ۳۰۰ مېگاواټه برېښنا افغانستان ته او ۱۰۰۰ مېگاواټه پاکستان ته لېږدوي.
د کاسا زر پروژه له منځنۍ اسیا د شېرخان بندر له لارې د افغانستان شمال ته ننوځي او له کندوز، بغلان، پنجشېر، کاپیسا، کابل لغمان او ننگرهار له لارې پر تورخم پښتونخوا ته اوړي.
افغانستان به له برېښنا د گټې اخیستنې تر څنگ په کال کې ۴۵ مېلیونه ډالره د برېښنا د ټرانزیت له پلوه هم عاید ولري.