د فلسطين د عامې روغتيا وزارت خبر ورکړی، چې په غزه کې ۲۵ تنو د خوارځواکۍ او د اوبو د کمښت له امله ژوند له لاسه ورکړی دی.
ياد کسان داسې مهال خپل ژوند له لاسه ورکوي، چې رويټرز خبري اژانس د يوې سرچينې په حواله راپور ورکړی، چې غزې ته د مرستو په موخه د غذايي موادو څخه بار يوه کښتۍ د قبرس په بندر کې بنده پاتې ده او د موادو د انتقال اجازه ورته نه ورکول کېږي.
د راپور پر اساس ويل شوي، چې په دغه کښتۍ کې دوه سوه ټنه غذايي مواد بار دي، چې د متحده عربي اماراتو لخوا چمتو شوي او په پام کې ده، چې د غزې د خلکو سره د مرستې په موخه هلته ولیږدول شي، خو اجازه نه ورکول کېږي.
دا په داسې حال کې ده، چې څه موده وړاندې نړۍوالو مرستندويه ادارو په غزه کې د انساني ناورين د رامنځ ته کېدو خبرداری ورکړی و.
بل لور ته رسنیو راپورنه خپاره کړي، چې د غزې اوسېدونکو په داسې حال کې په وږو خيټو د روژې مياشت پيل کړې، چې لا هم په غزه کې جنګ روان دی. هلته د ولږې لمن په پراخېدو ده او د فلسطينانو سره د مرستې د رسېدو لپاره لا هم خنډونه موجود دي.