نيويارک ټايمز راپور ورکړی، چې د امريکا پنټاګون تېره اوونۍ د امریکا کانګرس ته ویلي چې د ایران د جګړې لګښت د اکتوبر تر ۱۶مې پورې ۴۷.۱ میلیارد ډالرو ته رسېدلی او بمونه، توغندي او نور مهمات د دې لګښتونو له ۶۰ سلنې څخه زیاته برخه جوړوي.
د سرچينې په خبره، سره له دې چې ولسمشر ټرمپ لږ تر لږه د اوس لپاره د پراخو پوځي عملیاتو د بیا پیلولو پرېکړه ځنډولې، پنټاګون بیا هم په تېرو شاوخوا شپږو اونیو کې نږدې ۳.۵ میلیارد ډالر اضافي لګښتونه کړي دي.
د وروستیو اټکلونو له مخې، د امریکا هوايي ځواک د لسګونو جنګي او بم غورځوونکو الوتکو د ډلو د فعالیت لپاره ۷.۶ میلیارد ډالر لګولي دي.
سمندري ځواک د دوو درجنونو څخه د زیاتو جنګي بېړیو، چې څو الوتکې وړونکې بېړۍ هم پکې شاملې دي، د ځای پر ځای کولو لپاره ۱.۵ میلیارد ډالر لګښت کړی دی.
همدا راز د امریکا پوځ هم په سیمه کې د خپلو ځواکونو د ساتنې او ملاتړ لپاره ۲.۱ میلیارد ډالر لګولي دي.
د امریکا د مرکزي قوماندانۍ د معلوماتو له مخې، په ټوله کې تر ۵۰ زرو ډېر سرتېري د جګړې اړوند ماموریتونو ته ګومارل شوي دي.
پر دې سربېره، د فبرورۍ له ۲۸مې راهیسې چې جګړه پیل شوې، امریکايي پوځ ۲۹ میلیارد ډالر مهمات مصرف کړي دي.
له همدې امله د ځینو مهمو وسلو نړیوالې زېرمې کمې شوې دي مثلاً د پاټریوټ هوايي دفاعي سیستم توغندي. همدارنګه، له اسیا او اروپا څخه د امریکا د پوځي قوماندانيو اکمالات هم د دې جګړې لپاره لېږدول شوي دي.
د پنټاګون په وینا، په جګړه کې ۱۸ امریکايي سرتېري وژل شوي او تر ۸۶۰ ډېر نور ټپیان شوي دي.
د امریکا د ترانسپورټ قوماندانۍ د اکمالاتو او تجهیزاتو د لېږد لپاره ۹۲.۲ میلیون ډالر لګولي دي. د یوه چارواکي په وینا، د امریکا سایبري قوماندانۍ هم د “سایبري ملاتړ عملیاتو” لپاره ۱۴ میلیون ډالر مصرف کړي دي.
د نيويارک ټايمز په خبره، د کانګرس چارواکو د سه شنبې په ورځ وویل چې د دفاع وزارت وړاندې کړي لګښتونه یقیناً تر واقعي لګښتونو کم دي.
د هغوی په وینا، پنټاګون منلې چې په اټکلونو کې ۱.۵ میلیارد ډالر د تېلو او نورو لګښتونو لپاره نه دي شامل شوي.
معلومات ښيي، چې د امریکا د هغو پوځي تاسیساتو د ترمیم یا بیا جوړولو لګښتونه هم په کانګرس ته لېږل شویو معلوماتو کې نه دي شامل شوي چې د ایران د بریدونو له امله زیانمن شوي یا ویجاړ شوي دي.
په دغو تاسیساتو کې د بحرین په منامه کې د امریکا د سمندري ځواک اډه هم شامله ده. پنټاګون اشاره کړې چې ښايي ځینې دغه تاسیسات وتړي یا یې بېرته جوړ نه کړي. د کانګرس د چارواکو په وینا، که امریکايي پوځ یا کوربه هېوادونه د دغو تاسیساتو د بیارغونې پرېکړه وکړي، لګښتونه یې ښايي لسګونو میلیاردونو ډالرو ته ورسېږي.



2 Comments
په دې هیله چې امریکا په دې جګړه کې ناکامه شی دا به د منځني ختیځ لپاره په ګټه وي او د ناکامو شخړو په چوکاټ کې یوه بله ناکامه جګړه وي انشاء الله چې همداسې به وشي وماذالک علی الله بعزیز
د امریکا شکست او زوال مو ستر ارمان دی الله ج دې اسرایل د امریکا سره نیست و نابود کړي انشاء الله چې اسرایل هم د تباهۍ او بربادۍ خواته روان دی ورځې لنډې دي د غزی د شهیدانو وینې او د حماس او نورو جهادي ډلو سپیڅلی جهاد به نتیجه ورکوي ستر او شیطان امریکا به یواځې په ۵۰ ایالتونو پاتې شي او نور به امریکا په دې حالت پاتې نه شی و ماذالک علی الله بعزیز