اجیرې رسنۍ د شر او فساد پلویانو ته هوا ورکوي

یادؤنه: په هندوکش‌غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش‌غږ توافق ورسره شرط نه دی.

د انټرنېشنل په شمول یو شمېر اجیرې رسنۍ لکه: ازادۍ راډيو، امریکا غږ، Bbc، امو او… په افغانستان کې د شر او فساد ډلو ته هوا ورکوي؛ دا رسنۍ تر ډېره هڅه کوي چې د افغانانو ترمنځ د نقاق/بې اتفاقي لمن خوره کړي، حق په باطل، باطل په حق بدل کړي چې دا چاره هیڅ امکان نه لري.

دا ځل د شر او فساد ډله/مقاومتیان په هیواد کې ټولو مېشتو پرګنو سره په تقابل کې واقع شوي، ځکه چې افغانان نور نه غواړي د جنګونو/شخړو قرباني شي، څه باندې څلور لسیزې دې مظلوم او بې چاره ولسونو د خپل زړه وینې څکلې، په اوږو یې د جنازو کټونه تر قبرستانه وړي، د قبرونو له ویستلو، د مساجدو له لوډسپیکرو د جنازو د اعلانو له اورېدو ستړي شوي دي.

پورته ذکر شوې رسنۍ، تل د شر او فساد ببولالو ته انعکاس ورکړی او لا هم لګیا دې لابي ورته کوي؛ د افغانستان انټرنیشنل او امو، هغه د اسلامي او شرعي نظام ضد رسنۍ دي چې تر ډېره یې د عامه ذهنیت د ګمراه کولو په نیت نشرات پيل کړي؛ دا دوه رسنۍ د تېر پرځېدلي جمهوري نظام له سقوط سره سم فعالیت پیل کړ، ترڅو ذهنیتونه مغشوش او د اسلامي نظام پر وړاندې خراب کړي.

د شر او فساد ډله اوس مهال تر ډېره تبلیغاتي جګړه پیل کړې، دا جګړه مستقیماً د عوامو په روح او روان تاثیرات اچوي، د ویرې/اضطراب او د وحشت خورولو لپاره زمینه سازي کوي، د شرعي نظام پر وړاندې خنډونه پیدا کوي، په راتلونکي د خلکو باورونه له منځه وړي، هیلې او امیدونه یې وژني، د ټولنې مذهبي، ایډيالوژیکي، فلسفي، تاریخي او علمي برخې په بر کې نیسي؛ د دې رسنیو عمده هدفونه، د حقایقو په تړاو د خلکو تېراېستل، د ناسمو اطلاعاتو ورکول او منفي تبلیغات کول دي.

د شر او فساد ډله، له افغانستان څخه نیولې په ټوله نړۍ کې رټل شوې، تحقیر شوې او استفراق شوې ډله ده، دې ډلې له څه باندې دوو لسیزو راهیسې افغانان زورول او په عذاب یې اخته کړي وو، اداري او اخلاقي فساد کې ښکېل وو، د هیواد ملي شتمنۍ یې چور او تالان کړې، ولس زورونه یې ملي شعار وو.

اجیرې رسنۍ چې مقاومتیانو ته هوا ورکوي، دا په دې معنی ده چې د څو ډالرو په مقابل کې د دوی په ترسره کړو جنایتونو باندې پرده واچوي، ترڅو د خپلې نفعې په پار یې وکاروي، دا چاره یې زه د یو افغان په حیث بې معنی او بېهوده ګڼم، هیڅکله به هم د شر او فساد ظلمونه او وحشتونه د افغانانو له اذهانو ونه وځي او نه به بیا دې نجسې او تحقیر شوې ډلې ته وخت ورکړي.

که چیرې د مطبوعاتو یا رسنیو له اړخه وغږېږو، دا اصلاً په دوی ریشخند وهل دي، نه هوا ورکول؛ هغه داسې چې یو چا ته رتبه ورکول، له چا رتبه اخیستل، چا پسې له ځانه یو څه ویل چې په هغه کې له سره شتون و نه لري، برعکس دې ته ورته نورې کړنې، د توهینولو، سپکولو، ریشخند وهلو او د تحقیرولو په معنی دي.

یاد شوو موضوعاتو ته په کتلو، ستاسو په اند، اجیرې رسنۍ د شر او فساد پلویانو ته هوا ورکوي که هوا ترې باسي؟