د بهرنیو چارو وزارت پر خپله اېکس پاڼه لیکلي، چې په کابل کې د پاکستان د سفارت شارژدافیر یې احضار کړی او د نورستان د کامدېش ولسوالۍ په استقامت له ډیورنډ فرضي کرښې د شر او فساد عناصرو او داعش ډلې غړو د را اوښتو په تړاو یې قاطع اعتراض لیک ورته سپارلی دی.
د بهرنیو چارو وزارت په وینا، د ۱۴۴۸ هـ.ق کال د ربیع الثاني په ۱۳مه د کامدېش په استقامت د شر او فساد یو شمېر وسله وال عناصر او د داعش ډلې د پاکستاني پوځي رژیم په مستقیمه مرسته او لارښوونه د ډیورنډ کرښې له هغې غاړې د را اوښتو هڅه کړې، چې د افغان حکومت امنیتي ځواکونو یې مخه نیولې ده.
وزارت وايي، د پاکستان تر کنټرول لاندې سیمو کې د وسله والو د جلبوجذب، روزنې او تجهیز زمینه برابرول او بیا د ډیورنډ کرښې دې غاړې ته د هغوی سوق کول د افغانستان د حاکمیت له نقض سره برابر دي او خبرداری یې ورکړی، چې د ورته کړنو د دوام مسوولیت به د پاکستان پر غاړه وي.