د افغان حکومت ویاند، مولوي ذبیح الله مجاهد، د «حکومت د مطبوعاتو په هېنداره کې» پروګرام «د دیني او فرهنګي ارزښتونو ترویج، عدالت او قانون اوونۍ خبري ناستې» ته وویل، د ۱۴۴۷ هجري قمري کال په ترڅ کې په هېواد کې له ۲ میلیونه او ۴۴ زره جریبه څخه زیاتې امارتي او وقفي غصب شوې ځمکې تثبیت شوې دي. هغه زیاته کړه، په همدې موده کې د ۹۴۹ زره او ۶۶۴ جریبه غصب شویو امارتي او وقفي ځمکو د بېرته راګرځولو لپاره ۲۷۶ پرېکړې هم صادرې شوې دي.
نوموړي وویل، د همدې کال په ترڅ کې د ارشاد، حج او اوقافو وزارت له لوري ۴۴ جوماتونه جوړ او ۲۸ نور جوماتونه بیارغول شوي دي. همداراز ۳۰ زره حاجیان د حج ادا کولو لپاره سعودي عربستان ته استول شوي او د عمره کوونکو د فعالیت لپاره د ۱۰۸ جوازونو له ورکړې وروسته ۷۹ زره او ۳۷ عمره کوونکو هم عمره ترسره کړې ده.
مولوي ذبیح الله مجاهد زیاته کړه، د هېواد ابتدائیه محکمو په همدې موده کې ۲۶۲ زره او ۹۳۷ قضیو ته رسېدنه کړې، سترې محکمې ۶ زره او ۴۳۱ قضایي او اداري موضوعات څېړلي او ۷۱ زره او ۶۷۴ حقوقي دعوې د سولې او ابراء له لارې حل او فصل شوې دي.