د جمهوریت پر مهال د مخابراتو او معلوماتي ټکنالوژۍ وزیر، سید احمد شاه سادات، د ټولنیزو رسنیو له لارې د نویو جبهو د اعلانونو په اړه له تمسخره ډکه تبصره کړې ده او تش په نوم د جبهو په مشرانو یې ملنډې وهلي.
سادات په خپل فېسبوک لیکلي، چې پخوا د ټولنیزو رسنیو یو دود دا و، چې خلکو به سلفي اخیسته او ورسره لیکل به یې: «څنګه ښکارم ملګرو؟» خو د هغه په وینا، اوس دا دود بدل شوی او هر څوک د اطاق په یوه کونج کې درېږي، دوه ـ درې ډوله بیرغونه تر شا ږدي، عکس اخلي او ورسره لیکي: «نوې جبهه مې پرانیسته».
هغه له تمسخر په ډک انداز زیاته کړې، چې ځینې کسان لا تر دې هم وړاندې ځي او د همدې مجازي انځورونو ترڅنګ ادعا کوي چې «تخار، بدخشان او کندهار مې هم فتح کړل.»