له ارګ څخه په خپره شوې خبرپاڼه کې راغلي، چې ریاستالوزراء مقام د دفتر عمومي رئیس ډاکتر ملا عبدالواسع خادم د یوناما د سیاسي برخې له مشر سکاټ سمېټ سره په ارګ کې لیدلي او د افغانستان او ملګرو ملتونو ترمنځ د همکاریو، بشري مرستو او سیاسي تعامل په اړه یې خبرې کړې دي.
په دې لیدنه کې د افغانستان د غوښتنو د ښه انعکاس او د رامنځته کېدونکو ستونزو د هواري لپاره د افغان حکومت او ملګرو ملتونو ترمنځ د یوه اغېزمن میکانیزم پر جوړېدو، د نړیوالې ټولنې سره د اړیکو د پیاوړتیا او د افغانستان د اقتصادي وضعیت د ښه کېدو په اړه بحث شوی دی.
د یوناما سیاسي برخې مشر د تورخم له لارې افغانستان ته د زر کانټینره خوراکي توکو او درملو د لېږد لپاره د اسانتیاوو برابرولو له امله د افغان حکومت له رهبرۍ مننه کړې ده.
ملا عبدالواسع خادم له یوناما او د ملګرو ملتونو له نورو اړوندو بنسټونو غوښتي چې اړمنو افغانانو او د طبیعي پېښو زیانمنو خلکو ته خپلې مرستې زیاتې کړي او د افغانستان اوسني امنیتي، سیاسي او اقتصادي واقعیتونه په خپلو فعالیتونو کې په سمه توګه منعکس کړي.