یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د طالبانو واک ته رسېدو سره د سيمې او نړۍ ځينې استخباراتي ګټې له جدي ګواښ سره مخ شوې؛ په همدې اساس د نړيوالو جاسوسي سازمانونو په پلان جوړونه کې، د شر او فساد ډلې، داعش او آی ایس آی يو مثلث جوړ شو؛ تر څو په افغانستان کې جګړې ته بيا ځلي لاره هواره کړي.
د طالبانو په حکومت کې رامنځته شوی امن، د دې سازمانونو د ګټو لپاره يو لوی خنډ دی؛ ځکه هغوی په افغانستان کې د امن په يو داسي بې مثاله ماحول کې خپلې ګټې نه شي خوندي کولی.
د شر او فساد ډله چې تل يې په ولس کې تفرقه او تعصب خپور کړی، د کورنيو جګړو اصلي عاملين او د افغان ولس بې رحمه قاتلين دي؛ دغه ډله د وطن په ليلامولو کې ښکېله او د بهرنيو استخباراتي لوبو يوه مهمه آله پاتې شوې ده.
د دوی اصل هدف د پيسو او واک تر لاسه کول او په دې لار کې يې د ولس په وينو سوداګري هم بې له څه ځنډه جاري ساتلې؛ د مختلفو نړيوالو جاسوسي سازمانونو سره د دوی پخوانۍ اړيکې چې له پخوا راهيسې د افغانستان پر ضد د شومو اهدافو په عملي کولو کې وې، د طالبانو د واک په راتګ سره بيا تازه شوې؛ دوی د څو ډالرو په بدل کې ځان غربي پروژو ته وړاندې کوي، تر څو د نړيوالو جاسوسي سازمانونو ملاتړ او ګټې خوندي کړي.
د شر او فساد ډلې شعار په تعصب ولاړ دی؛ همېش يې د افغان قومونو تر منځ د نفاق تخم کرلی دی؛ دوی په ځانګړې توګه هغه افغانان چې د تعصب په ناروغۍ اخته وي؛ په ژبنيو، سيمه ييزو شعارونو او پيسو فريبوي، تر څو هغوی د خپلو شخصي مفاداتو لپاره وکاروي.
د دوی تېرو کړنو او تاريخ ته په کتلو؛ نړيوالو استخباراتي شبکو بيا پرې پانګونه وکړه او د طالبانو د حکومت پر ضد يې د هغوی روزنه پيل کړه؛ له آی ایس آی سره د دوی پخوانۍ اړيکې چې احمد مسعود ته د هغه له پلار احمد شاه مسعود څخه په ميراث پاتې وې، اوس يې دغه اړيکې د غرب په لارښوونه تازه شوې دي؛ په ځانګړي ډول آی ایس آی ته د غربي استخباراتو له لوري ور وپېژندل شول او په پاکستان کې د آی ايس آی تر څار لاندې يې روزنه کېږي.
د دې ډلې اصلي موخې تعصب، د ولس تر منځ د نفاق خپرول، غلاوې او قتل عام وو؛ د طالبانو سره د دوی پخوانۍ دښمني او د بهرنيانو لپاره د غلامۍ اوږد تاريخ، د دې سبب شو چې بيا ځلي يې د نړيوالو استخباراتي سازمانونو پام ځان ته واړاوه.
داعش چې همېش يې د اسلام په جامه کې د غربي ګټو دفاع کړې؛ په هر ځای کې د خلافت په بهانه د مسلمانانو سره په جګړو بوخت دي، تر څو د غربي ګټو دفاع او د غرب دښمنانو ته سرخوږی جوړ کړي؛ د دوی له پيدايښت څخه په سيمه کې، په ځانګړې توګه په پاکستان کې؛ د آی ايس آی تر څار لاندې روزل کېږي.
په بل حساب که و وايم چې پاکستاني پوځ او آی ايس آی د داعش جامه اغوستې او د دوی تنخوا خواره دي؛ چې له وخته په پاکستان کې روزل کېږي تر څو سيمه کې پرې غربي او صهيونيستي اجنډاوې پوره کړي.
دا چې دغه د مسلمان په جامه کې غربي پوځ (داعش) هم له وخت څخه د طالبانو سره دښمني لرله؛ چې د غرب له وتلو سره يې آی ايس آی ته د دوی د لا تقويې امر وکړ کوم چې اوس هم پاکستان کې روزل کېږي، بلکې د مشرانو يې د پاکستاني پوځ په مېلمستونونو کې د مېلمنو غوندي خدمت کېږي.
آی ایس آی او د پاکستان پوځ چې د پاکستان له جوړېدو راهيسې یې هر وخت د غربي پروژو د ټيکه دار کردار درلودلی؛ په سیمه کې له غرب او نورو هېوادونو څخه پروژې اخلي چې په بدل کې ورته پېسې ورکول کېږي؛ د پاکستان اقتصاد همدا پروژې ګرځېدلي او د جګړې پلي کول یې دکانداري ده.
بل طرف د افغانستان سره د ډيورنډ نامنل شوې کرښې او د افغانستان د غصب شوې ځمکې مسئله هم شتون لري؛ چې آی ايس آی همېش هڅه کړې ترڅو په افغانستان کې جګړه جاري وساتي، ځکه که جګړه ودرېږي، نو ممکن افغان ولسونه له پاکستان سره حساب وکړي او د خپلې غصب شوې ځمکې د آزادۍ غوښتنه وکړي؛ يوه وجه هم همدغه ده چې آی ايس آی افغانان په جګړه اړولي.
آی ايس آی د پاکستان د پايښت لپاره مجبوره دی چې د غربي طاقتونو ملاتړ له ځان سره ولري او د هغوی د ملاتړ لپاره بايد کار ورته وکړي.
افغانستان کې د جګړې درېدلو سره د نړيوالو جاسوسي سازمانونو منافع په خطر کې لوېدلو سره ځکه و ده (آی ايس آی) ته د جګړې د پلي کولو پلان او هم د جګړې لپاره ورته د شمالي ټلوالې او داعش ادرس ورکول شو.
د شر و فساد او داعش ډلې په ځلونو نيول شويو غړو اقرار کړی چې دوی د پاکستان په بلوچستان سیمه کې د آی ایس آی او پاکستاني پوځ تر رهبري لاندې روزل کېږي؛ دوی په واضح ډول وايي چې په افغانستان کې د جګړې او ګډوډۍ پلانونه د آی ایس آی له خوا ورکړل شوي دي.
په ۲۰۲۳ ميلادي کال کې پاکستان د شمالي ټلوالې او داعش ترمنځ یو تړون رامنځته کړ؛ ترڅو په ګډه د افغان حکومت پر خلاف جګړه وکړي؛ د آی ایس آی په رهبري په پاکستان کې دغه ډلې یوه توافق ته هم سره ورسېدلې چې په کې د طالبانو پر ضد جګړه کې به يو له بل سره مالي او تسليحاتي مرستې کوي.
د داعش تر ماسکو پورې رسېدل؛ چې پکې پاکستاني اتباع هم شامل وو، دغه داعشيان د شر و فساد ډلې په جامه کې تر روسیې پورې ورسېدل؛ ځکه له روسیې سره د غلامۍ اړیکې احمد مسعود ته د پلار څخه په میراث پاتې وې.
همدارنګه عبدالرشید دوستم او د دې ډلې نورو مشرانو ته دغه اړيکې د افغانستان د ټوپک سالارۍ او کورنۍ جګړې له وخته ور پاتې وې؛ د دغو اړیکو له لارې دوی وتوانېدل چې داعش تر ماسکو پورې ورسوي.
د دغو درې سره لوبغاړو (شمالي ټلواله، داعش او آی ايس آی) ګډې موخې د غربي پروژو عملي کول، پيسې او افغانستان کې جګړه ده؛ تر څو دوی خپلو اهدافو ته و رسېږي؛ د دوی په مخ کې خنډ طالبان ګرځېدلي دي، ځکه د طالبانو په شتون کې به افغانستان بيا ځلي د جګړې په ډګر نه بدلېږي؛ همدا وجه ده چې دغه درې واړو د طالبانو مخالف يو له بل سره اتحاد کړی.
