یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د تېر جمهوري نظام غړي، د پارلمان وکیلان او د بېلابېلو څوکیو ټېکداران چې اوس مهال له هیواد څخه بهر په کمپونو او لارو کوڅو کې شپې او ورځې سبا کوي، بیا هم په قراره نه کښېني، غواړي چې په یو نه یو ډول هیواد کې شر جوړ کړي، خپل منځي شخړې او تاوتریخوالی رامنځته کړي.
دا شر اچوونکي بغاوتګر، نه غواړي چې په افغانستان کې دې امن او سوکالي وي، اتحاد او ورورګلوي وي؛ دوی د تل لپاره د اسلامي نظام پر وړاندې د ضد نغارې وهلي او لا یې هم له خپلو بېهوده او مغرضانه کړنو لاس نه دی اخیستی.
شر او فساد جوړوونکي بغاوتګر تر ډېره دلته په هیواد کې هغه اشخاص وو، چې اکثره یې د یرغلګرو امریکایي ځواکونو د دفترونو صفاکاران، اجنټان، لاسپوڅي، د نامشروع پروژو قراردادیان او په ځينو نورو برخو کې یې همکاران وو.
دې بغاوتګرو د خپلو بادرانو خبرې په ځمګه نه غورځولې، یعنې د خپلو بادارانو فرمانبردار او د هر امر تابع مخلوق وو، د هغوی په اشارو به یې په هیواد کې قومي او ژبني تعصبات رامنځته کول چې، له دې لارې یې په میلیونونه ډالر لاسته راوړل، د شرابو او کبابو په مېلو کې غرق وو، د هیڅ چا پروا به یې نه کوله.
دا چې بغاوتګر او شر اچوونکي اوس هم د سوشل ميډیا له لارې، د اسلامي او شرعي نظام خلاف بغارې او نغارې وهي، د دوی په ژوند د نا اهلو حیواناتو ژوند شرف لري، زما په اند، بغاوتګر په خپل ارزښت اوس وپوهېدل، چې باداران یې ورته هیڅ کوم ځانګړی اهمیت نه ورکوي، هغوی هم په دې پوهېدلي چې دا خاینین هیواد/وطن چې د مور حیثیت لري، هغه ته نه دي وفاداره، نو مونږ ته به څه وفادار پاتې شي، نو ځکه یې ذلیله ساتلي دي، خپل کثافات پرې پاکوي.
د بغاوتګرو شتون په هیواد کې د ویرې فضا راخوره کړې وه، هیڅ څوک له کوره په ډاډه زړه نه شوای وتلی، که و به وته، دوه ویرې به یې د کورنۍ له غړو یا له والدینو سره وې؛ لومړی دا چې زوی/ورور به مې ژوندی کور ته راځي او که نه؛ دوهم دا چې د اختطاف ګرو/انسان تښتوونکو ډلې ته په لاس ور نه شي، بیا به رانه د خوشې کولو په تړاو د میلیونونو ډالرو غوښتنه کوي؛ دا ویرې تر ډېره په هیواد کې موجودې وې.انسان تښتونه/اختطاف په ډېره لوړه کچه، د وزیرانو او د پارلمان د وکیلانو، د تورو هیندارو زغره وال موټرو کې ترسره کېده.
د دې بغاوتګرو او شر اچونکو ظلمونه، غصب، وحشت، باج/قلنګ اخیستنه او وسله والې غلاوې به هیڅکله افغان ولسونه له ذهنه ونه باسي او نه به یې له ذهنه ووځي؛ په هیواد کې ټول مېشت قومونه د خدای جل جلاله شکر اداء کوي، چې د انسان په جامه کې، له دې دوه پښو شرمښانو یې خلاص کړل.