د پاکستان د پوځ پخوانی لوړ رتبه افسر، عادل راجا د خپلو سرچینو له قوله ویلي، چې بلوچستان ایالت ګلستان سیمه کې تېره شپه افغان ډرونونو هغه مرکز په نښه کړی، چې د فیض الله خان په نوم شخص تر څارنې لاندې د پرځول شوي جمهوریت د یوه غړي قهار او د هغه د ملګرو له خوا کارېده.
هغه زیاته کړې، چې قهار د کندهار اوسېدونکی دی او دغه مرکز یې د خپلو ملګرو د فعالیتونو لپاره کاراوه.
عادل راجا ټینګار کړی، مرکز کې ګڼ کسان موجود وو او هدف په ډېر دقت سره ویشتل شوی دی.
نوموړي زیاته کړې، چې د بلوچستان د ګردي ځنګل ولسوالۍ شکرآب سیمه کې هم د ډرونونو په مټ هغه مرکز په نښه شوی، چې د حاجي غلام، حاجي محمد ولي او د پرځول شوي جمهوریت اړوندو کسانو او د هغوی د ملګرو له خوا کارېده.
د پاکستان د پوځ دې پخواني لوړ رتبه افسر دا هم ویلي، چې په دغو مرکزونو کې له سلو زیات کسان موجود وو.
عادل راجا دغو بریدونو کې د پرځول شوي جمهوریت پاتې شونو ته د اوښتو تلفاتو د شمېر په اړه څه نهدي ویلي؛ خو ټینګار یې کړی چې د درنې مرګژوبلې اوښتو احتمال شته.