د کار او ټولنیزو چارو وزارت وايي، د لومړي ځل لپاره د قطر ګډ دولتي شرکت او د افغانستان د کارموندنې خصوصي شرکتونو ترمنځ د افغان کارګرانو د لېږد په تړاو هوکړه وشوه، چې له مخې به یې د اوس لپاره افغان کارګرانو ته ۷۰۰ کاري فرصتونه ځانګړي شي.
د ياد وزارت وياند وايي، دا پرمختګ د کار او ټولنيزو چارو وزارت او قطر د دولتي مسؤلینو ترمنځ د تخنیکي همغږیو، ناستو او هوکړو له مخې ترسره شوی دی، چې موخه یې په قانوني او خوندي توګه له هېواده بهر د افغان کارګرانو اعزام او په راتلونکي کې د هغوی له حقوقو څخه ملاتړ دی.
د معلوماتو له مخې د يادې پروسې د نوم لیکنې څرنګوالی، شرایط او ځانګړي مرکزونه به وروسته اعلان او په ډاګه شي.