ليکوال او شنونکي جابر نعماني د پاکستان حکومت او پوځ دننه وروستۍ سياسي بې ثباتۍ او د دې هېواد د حکومتونو جوړښت ته په اشارې ليکلي، چې د پاکستان خلکو ته پکار ده، چې دا درک کړي چې د دوی پوځ د ظلم لپاره جوړ شوی او له هغوی څخه د دفاع کولو وړتيا نه لري.
د ښاغلي نعماني په خبره هغه ورځ چې په پاکستان کې د ولس د غوښتنې سره سم يو رښتينی ولسي حکومت جوړ شي او هغه حکومت د پاکستاني ولس د غوښتنو او ګټو مطابق عمل وکړي، په هماغه ورځ به نه يوازې په افغانستان کې، بلکې د ټولې سيمې او نړۍ ستونزې پای ته ورسېږي.
د هغه په خبره بنسټيزه ستونزه دا ده، چې پاکستان کې ولسي حکومتونو ته په رښتيني ډول د حکومت کولو اجازه نه ورکول کېږي او لامل يې دا دی، چې د نړۍ شيطاني ځواکونه په دې سيمه کې داسې واکمنانو ته اړتيا لري چې نه وجدان ولري او نه ضمير؛ تر څو په ارزانه بيه وپېرل شي او هغوی وکولای شي چې د بېثباتۍ د رامنځته کولو لپاره ترې ګټه واخلي.
نوموړي زياته کړې، چې د پاکستان پوځ يو نيابتي پوځ دی، چې په نړۍ او سيمه کې فساد خپروي او په خبره یې کله چې سخت وخت راشي نو له کليو او ښارونو څخه به وتښتي او تاسو به په تش ميدان کې يوازې پرېږدي.
ښاغلي نعماني د پاکستان ولس ته په خطاب کې ويلي، چې تاريخ وګوري، د خپل پوځ کړنې وګوري؛ د هغه په وينا دا يو ډېر بېغيرته پوځ دی، چې له همدې امله ظلم او مظالم کوي.